كتبت : فاطمة سعد
مين اكثر تأثرا بالازمات العالمية
الاقتصاد القائم على التصنيع من اجل التصدير
ام من اجل احلال الواردات ؟
طبعا القائم على التصنيع من اجل التصدير
طيب من اكثر قدرة على التوسع والنمو وتحقيق ارقام مبهره ؟
برضه الاقتصاد القائم على التصنيع من اجل التصدير
مين اكثر قدرة على تحمل الصدمات ؟
الاقتصاد القائم على احلال الواردات
اذن مصر مختارتش احلال الواردات على اساس المنظره !! فيه اسباب عمليه وراء هذا الاختيار
جزء من اختيارنا لفكرة احلال الواردات ( بشكل جزئى ) ، قائم على عدة اسباب
1- الاستثمارات الخارجيه بتتناقص فى العالم كله تدريجيا خلال العقد الماضى يعنى الدول بتتخانق على كيكه بتصغر !!
2- نوعية الاستثمارات الخارجيه نفسها اقل من المأمول ، يعنى الاستثمارات ذات الطبيعة التكنولوجيه العاليه مبتجيش ليك الا تحت ظروف وشروط صعب قبولها غالبا
3-رغبتنا فى انشاء اقتصاد اكثر قدرة على تحمل الازمات و الصدمات !
النقطه الاخيره دى مهمه جدا جدا ، لو واحد بيخطط لدوله فى محيط فى منتهى السوء ( هو الاسوأ على وجه الكره الارضيه فى رأيى) حيث اغلب جيرانك اما دول منهاره ، أو مستهدفه لاسقاطها ، او معاديه !! وفى ظروف محليه غير مستقره (( عملاء مدعومين دوليا ذوى قدرات وخبرات تخريبيه عاليه و انتشار واسع فى القاعدة الشعبيه ))
اضافة للرؤيه المؤكده لحدوث عدة ازمات اقتصاديه وغيره فى هذا العقد!
والجائحه كانت اول الغيث زى مبيقولوا
انت فى التصدير بتحط فى اعتبارك مستهدفين جدد ( افريقيا واسيا وامريكا الجنوبيه ) وبتحط فى اعتبارك (( تتحول لمركز اقليمى )) للغاز ، الكهربا ، تكرير المواد البتروليه وصناعاتها ، التجارة واللوجستيات وغيره
بس كده ؟
لا …….. ونوعت الديون الخارجيه بتاعتك بشكل يجعل فيه مصالح مشتركه بينك وبين اغلب المؤسسات الدوليه ( بنك دولى ، صندوق نقد وغيره ) و مستثمرين وصناديق استثمار كبرى ( فيه فايدة استراتيجيه من الشكل ده لان سقوطك هيبقى مؤلم جدا للجميع ، بالتالى مش هيبقى امر مرغوب فيه ، ناس كتير تفضل انك تبقى كويس بشكل ما عشان تسدد !!)
ليه كل ده؟
عشان تزود اهميتك الاستراتيجيه للجميع ،سقوطك يوم ما يتم استهدافك ، هيبقى مكلف جدا جدا جدا ، تكاليف السقوط تفوق اى مكاسب ممكنه !!
يعنى المخطط لمستقبل بلدك بيعمل حساب يوم ما ، لو تآمر عليك الملأ كالعادة ، لفرض عقوبات او لحصار نتيجة لتصرف ما ، او بتلكيكه حتى ، يلاقوا فى وسطهم ناس بتقول ، ياعم استنى بس ، مين اللى هيدفعلنا الفلوس دى؟ بنوكنا كده هتتاثر ومين اللى هيوردلنا الطاقه ، ومين هيصدر لنا الغاز، شركاتنا هتتاثر ، اقتصادنا هيتأثر ، لا مش لاعبين ومش موافقين !! اديك شايف الموقف العالمي من روسيا حصل فيه انقسامات و لو طول الانقسامات هتزيد
شىء مشابه بتعتمد عليه تركيا فى السقوط الحر لاقتصادها حاليا ، هى عارفه ان بنوك جنوب اوروبا لن تحتمل هذه السقطه ، والاتحاد الاوربى و المؤسسات الدوليه لابد ان تمد يد العون ، والا سيعانى الجميع بشكل مؤلم!! وعندما فرضت عليها عقوبات ، كانت شكليه لا تمس اقتصادها بشكل حقيقى !!
احنا استفدنا من درس مماثل ، بس بمعلمه وحرفنه !!
بنتداخل فى النظام العالمى بقوة عشان نبقى جزء مؤثر منه ، وفى نفس الوقت بنأمن نفسنا باقتصاد يحتمل الازمات على عكس المعتاد فى عملية الاندماج فى النظام العالمى والعولمه !!
والدليل قدامك ، انت من الدول النادرة فى العالم ، التى لم تعانى اطلاقا فى توفير المواد الغذائيه وباسعار ممتازه لمواطنيها رغم الجائحه التى اثرت سلبا على اغلب الدول فى قدراتها على توفير السلع نفسها او فى الاسعار ، فى فترة من الفترات على الاقل !!
و اليوم مع الحرب الروسيه و بينما ارفف الأسواق في اوروبا تعاني نقصا في السلع و ارتفاعا في اسعارها .. نجد نفس السلع متوفره عندك و بأسعار اقل نسبيا رغم التضخم العنيف!
بوابة الأخبار العربية تأسست وكالة A N G عام 2009 على يد الفنان والكاتب الصحفي ناصر عبد الحفيظ
